Okusoma Pass PLE ssaako n’okwesiga Katonda bituyambye okuyita obulungi – Abayizi b’e Mukono

Bya Eric Yiga

Abasomesa ssaako n’abayizi ku ssomero lya Ocead Fields Preparatory School erisangimbwa mu ggombolola y'e Nama mu disitulikiti y'e Mukono bali mu kubinuka masejjere oluvannyuma lw’abayizi babwe okukola  obulungi.

Bano  ku bayizi 11 be baatuuza omwaka oguwedde,  8 baayitidde mu ddala lisooka ate 3 ne bayitira mu ddala eryokubbiri.

Abasomesa Ba Ocean Fields Prepartory School Nama Ng'asitudde Abayizi Abakoze Bulungi.

Ochom Travis Cyril ye muyizi asinze banne mu ssomero ng’afunye obubonero buna. Ono agamba nti okusoma ennyo olupapula lwa Bukedde ng’akola ebibuuzo bya PASS PLE ssaako n’okwebuuza ku basomesa be bye bimu ku bimuyambye okuyita ebigezo bye, era agattako nti ayagala kwegatta ku Ssomero lya St. Marys College Kisubi  SMACK.

Travis Ochom Afunye 4 Wa Oceanfields Preparatory School Nama Mukono.

Aba Mukono Boarding bamaze emyaka 12 nga tewali muyizi afuna 4.

Ku ssomero lya Mukono Boarding Primary School  libadde ssanyu oluvannyuma lw’omuyizi Joanna Alimuwa okubakutulako ekikoligo ekibadde kimaze emyaka 12 nga tebalina muyizi afuna bubonero buno.

Bano basazeewo okukwata ebidomola ssaako n’emiggo ne batandika okubikuba  nga bwe bawogganira waggulu  olw’okusima Katonda okubatuusa kino, era Norah Mukiibi omu ku babadde basomesa omuyizi ono agamba nti buno buwagunzi bunene gyebali.

Ye nnyina wa Alimuwa agamba nti okugaana okubuusa  muwala okugenda mu kibiina ekirala nga bwe kyali kiragiddwa  bye bimu ku biyambye muwala we okukola obulungi.